રાજકોટ અગ્નિકાંડનાં પગલે તંત્ર જાગ્યું: સરકારે તૈયાર કર્યો ખાસ પ્લાન, ફાયર ઓફિસરની નિમણૂંકને લઈને ગુજરાત સરકાર એક્ટિવ થઈ
![top-news](https://gujaratvandan.com/public/uploads/images/newsimages/GujaratVandan31052024_083341_Fire.webp)
- 31 May, 2024
રાજકોટમાં ટીઆરપી ગેમઝોનમાં લાગેલી આગમાં 33 લોકોનાં મોત બાદ હાલ રાજ્ય સરકાર સફાળી જાગી છે. તેને અનુસરીને સરકારે કેટલાક ફેરફાર કરવાનો પણ નિર્ણય કર્યો છે. સરકાર હવે ખાનગી એકમોમાં એક ખાનગી ફાયર ઓફિસરની નિમણૂંક કરવા આદેશ આપી શકે છે. જે તે મોટા એકમો જ્યાં વધુ ભીડ એક્ઠી થાય છે તેવા એકમોમાં નિમણૂંક માટે આદેશ કરી શકે છે.
રાજકોટમાં TRP ગેમિંગ ઝોનમાં 25 મેના રોજ લાગેલી આગમાં કેટલાક લોકો જીવતા ભૂંજાઈ ગયા, કેટલાય પરિવારો વેરવિખેર થઈ ગયા. આ અગ્નિકાંડને પગલે હવે રાજ્યમાં તંત્ર સફાળું જાગી ગયું છે. ત્યારે હવે અલગ-અલગ જિલ્લાઓમાં તંત્ર દ્વારા ચેકિંગ હાથ ધરાયું છે અને ફાયર સેફટી અને ફાયર NOC ન હોય એવા ઘણા એકમોને સીલ કરી દેવામાં આવ્યા છે. ત્યારે હવે સરકાર ફાયર સેફ્ટીને લઈને નવા નિયમો બનાવવા પર વિચાર કરી રહી છે.
અગ્નિકાંડ બાદ રાજ્ય સરકાર દ્વારા પ્રિવેન્શન ઓફ ફાયર એક્ટમાં સુધારો કરવાની વિચારણા ચાલી રહી છે. હવે સરકાર વધુ ભીડ થાય તેવા એકમોમાં ફાયર ઓફિસરની નિમણૂંક કરવાનો આદેશ આપી શકે છે. કોમર્શિયલ એકમોએ પ્રાઇવેટ ફાયર ઓફિસરની ભરતી કરવી પડશે. આગ લાગવાની ઘટનામાં જવાબદારી ફાયર ઓફિસરની રહેશે. સરકારી વ્યવસ્થાઓ પર ભારણ ન વધે તે માટે સરકાર વિચારણા કરી રહી છે. એવા મોટા એકમો કે જ્યાં મોટી સંખ્યામાં લોકો ભેગા થતા હોય, ભીડ થતી હોય એવા એકમોમાં ફાયર ઓફિસરની નિમણૂંક કરવાનો આદેશ કરી શકે છે.
આવી જગ્યાઓમાં મોલ, મલ્ટીપ્લેક્સ, હોટેલ, સિનેમા હોલ, કોમ્યુનિટી હોલ સહિતના એકમોને આવરી લેવામાં આવશે. આવી જગ્યાઓ પર પ્રાઈવેટ ફાયર ઓફિસરની કરવી ભરતી પડશે. આમાં નિમણૂંક કરાયેલ ખાનગી ફાયર ઓફિસરની વિવિધ જવાબદારીઓ રહેશે. જેમાં ફાયરના સાધનો લગાવવાથી લઈને તેમાં ચેકિંગ અને જાળવણી જેવી જવાબદારીઓ રહેશે. સાથે જ સરકારી તંત્રનું ખાનગી ફાયર ઓફિસર અને જે તે એકમો પર પણ નિયંત્રણ રહેશે.